🌿සැප්තැම්බර් වෙසක් !

 

මේ සැප්තැම්බර් මාසෙ තවත් එක සෙනසුරාදාවක්......

මං මේක ලියන්න වාඩි වෙලා ඉන්න ජනේලෙ ළඟට දැන් හොඳට හුළං එනවා.

ඈත රැහැයියො කෑ ගහන හඬ ඇහෙනවා.දැන් වෙලාව රෑ අටට ළඟයි.පන්සලක් වගේ,ගෙදර පුදුම නිහැඬියාවක්. පුංචි සද්දයක් වත් නැහැ. අම්ම රෑට උයල ඉවරයි.අම්ම පල්ලෙහා අම්මගෙ පොතක් බලන ගමන්. 

මම උඩ ජනේලෙ ළඟ මට හිතෙන දේවල් ලියන ගමන්.අද තාත්තා නැහැ. තාත්තා නැතුව ගෙදර ගොඩක් පාලුයි. ඒ වුණත් ඒ පාලුව අස්සෙන් හිතේ සියුම් තැන් ගොඩාක් සියුම්ව ස්පර්ශ වෙලා ලියන්න මට ගොඩක් දේවල් ගලාගෙන එනවා.මං මේ ලියන වෙලාවෙ ඈතින් ඇහෙනවා වෙසක් සිංදු. ඒව වෙසක් සිංදු නෙමෙයි නමුත් මම ඒවට කියන්නෙ එහෙම. 

" බුදු සාදු බුදු සාආදු, සඳුන් ගසාක් වෙන්නම්ම්ම් මම,සමන් වැලාක් වෙන්න්ම්ම්.....''

මම පන්ති ගිහින් අම්ම එක්ක ගෙදර ආවෙ දැන් ටිකකට කලින්. ඒ එනකොට හංදියෙ බල්බ් වැල් දාලා, කොඩි දාලා සරසලා. ලයිට් කණුවක ලොකු ස්පීකර් එකක් ගැට ගහලා. 

" බුදුන්ගේ අමා ධර්මේ.......''

" ඇයි අම්මෙ මේ ? ''

" ටවුන් එකෙ අද ධර්ම දේශනයක් වෙන්න ඇති'' 

" අපිත් යමුද අම්මෙ?''

" මටත් ආසයි, ඒත් තාත්තා නැතුව රෑ වෙලා ඕවට යන්න බෑනෙ චූටි දුව ''.....

" හ්ම්ම්.....ඒත් මේ ඔක්කොම එක්ක වෙසක් සිරියක් වගේ එකක් දැනෙනවා නේද අම්මෙ ?'' 

" අනේ ඔව්, මමත් ආසයි ඒ වෙසක් ගතියක් දැනෙන එකට...... චුට්ටක් පිටිපස්ස බලන්න මට රිවස් කරන්න.'' 

" දුර පෙනෙන තැනිතලා, අනුරාධපුර දිහා.....'' 

මං ගේ ඇතුළට ආව ගමන්ම බෑග් එක කාමරෙන් තියල ජනේලෙ ඇරල ඈතින් ඇහෙන ලස්සන සිංදු අහන් හිටිය. 

ඊටපස්සෙ බිස්කට් කාල තේ බිව්ව අපි දෙන්නම. මම දැන් පැයක් විතරම ජනේලෙ ළඟ. අද අපි රෑට කන්නෙ පාන්. 

හරිම නිවුණු දවසක් අද. 

මේ වෙසක් මාසෙ නෙමෙයි. නමුත් අර ඈතින් ඇහෙන සිංදු හිතට ලොකූ සැනසීමක් වගේ. හරිම සනීපයක් දැනෙනවා ගතටත් සිතටත්. මම දන්නවා මට ෆෝන් එකෙන් ඔය සිංදු ටිකම අහන්න පුළුවන් බව. නමුත් , ඊට වඩා අර ඈතින් ඇහෙන සිංදු වල තමයි මට දැනෙන හැඟීම ගැබ් වෙලා තියෙන්නෙ.....

හුඟක් හිත බරවුණු, හරිම මහන්සි බවක් දැනුණ, සතුටක් නොතිබුණු සති කීපයක්ම ගෙවිල ගිහින් හිතට ලොකූ සැහැල්ලුවක් දැනුණ දවසක් අද. ඇත්තටම ලස්සන දවසක්.....

අද පන්තියෙ මම කරපු පේපර් එකට ලකුණු 90 ක් තිබුණා. ඇත්තටම මට දැන් ගොඩාක් සනීපයි, සැහැල්ලුයි. අද සර් කියල දුන්න ඒවත් ඔක්කොම හොඳට තේරුණා. 

අද ගෙදර ආවම ඒ සැහැල්ලු බව තවත් දැනුණා, වෙසක් නොවුණට ඈතින් ඇහෙන වෙසක් සුවඳ මුසු රසය නිසා. 

පුදුම විදියට නිවුණු මොහොතක් මේ මොහොත..... මම බැල්කනි එකේ ලයිට් නිව්වා. දැන් අහසම කලුවරට ලස්සනට තියෙනවා. මේ නිවුණු රාත්‍රියේ සඳ ලස්සනට පේනවා.....ඈතින් බැති ගී ඇහෙනවා. 

මේ සැප්තැම්බර් තමයි, 

ඒත් අද මට වෙසක් ! 

වෙසක් තියෙන්නෙ අපේ හිත් වල....හිතේ නිවුණු බව තුළ. හිතේ සතුට තුළ......වෙසක් කියන්නෙ වෙනසක්...අද ඇත්තටම වෙනස් දවසක්...! 

"මට වෙසක් ගෙනත් දුන්න මගේ ටීචට ගොඩක් පිං ! '' රෑ අහසෙ තරු දිහා බලාගෙනම මම එහෙම හිතුවා. 

ටීච අද මහියංගණ අහස දිහා බලාගෙන මොනව හරි හිතනවා ඇති. අපේ මිදුලට පායල තියෙන මට පෙනෙන තරුවට එහෙ ඉන්න ටීචව ත් පෙනුණොත්,

"තරූ, මගේ ටීචට මේ ඔක්කොම කියන්න....''

 මං මේ ඔක්කොම ලියලා, පැත්තකින් තියලා තව ගොඩක් වෙලා අහස දිහා බලාගෙන අර ඈතින් ඇහෙන සිංදු අහන් ඉන්නවා.........මේ සුළං රැල් මට වෙසක් සිරි ගේනවා.....

" දරුවන් වෙත දෙනෙත් හෙළා හිමි වැඩ ඉන්නේ....''  

# අද, හිත පිරුණු, නිවුණු දවසක් !.... 🌸

23/9/23 

✒️Se.Ka.

# මේ උඩ තියෙන පින්තූරෙ ටීච අද නුවරදි ගත්ත එකක්....❤